2010年07月

イメージ 1

 「慶良間(きらま)あ見(み)いしが睫毛(まちげ)え見いらん」んでぃぬ黄金言葉(くがにくとぅば)ぬあん。
 日本語(にふんぐ)ぬ「燈台下暗し」んでぃぬ意味とぅ大概(てえげえ)や同(い)ぬむんやん。昔(んかし)え、今(なま)ねし、電話(でぃんわ)そうな通信手段(つうしんてぃだ)ぬん無(ね)えらんたくとぅ、進貢船(ちんくんしん)ぬ入(い)っち来(ちゅ)ゅうるばあや、慶良間から火立(ふぃいた)てぃい(狼煙)ぬ上がやあに、首里(しゅい)、那覇(なあふぁ)ぬ人(ちゅ)んちゃあんかい知らちゃんでぃぬ事(くとぅ)やん。やくとぅ、首里・那覇ぬ人んちゃあや進貢船迎(んけ)えゆるしこういむこういぬなたるばすやたん。
 沖縄戦(うちなあしん)んじ、米軍(びいぐん)が初(はじ)みに上陸(じゅうりく)さる所(とぅくま)ん、くまやたん。先(ま)じ、え水(みじ)、確保(かくふ)そおかんでえ、ならんでぃぬ考えんあてぃ、周(まあ)いぬ島あ先(さち)に取(とぅ)らりいるばあどぅやる。

【語句】
慶良間あ見いしが=慶良間は見えるが。
睫毛え見いらん=睫毛は見えない。
んでぃぬ黄金言葉ぬあん=ということわざがある。「んでぃ」は「~と」。「んでぃぬ」で「~との」。
日本語ぬ「燈台下暗し」んでぃぬ=日本語の「灯台下暗し」という。
意味とぅ大概や同ぬむんやん=意味とたいだいたい同じだ。「同ぬむん」は「ゆぬむん」とも発音される。
昔え、今ねし=昔は今のように。「今ぬ如(ぐとぅ)」でもよい。
電話そうな通信手段ぬん無えらんたくとぅ=電話のような通信手段もなかったから。「~も」を表わす助詞は通常は「ん」であるが、前語の語尾が「ん」である場合は「ぬん」となる。前語の語尾が「ぬ」に変音すると考えてもよい。この場合はの標記は通常通り「手段(てぃだぬ)ん」でよい。筆者は前語の語尾の発音を示したい考えから「ぬん」としたのである。
進貢船ぬ入っち来ゅうるばあや=進貢船が入港して来る場合は。
慶良間から火立てぃい(狼煙)ぬ上がやあに=慶良間から狼煙が上がり。「あがやあに」は「あがてぃ」でも良い。
首里、那覇ぬ人んちゃあんかい=首里、那覇の人たちに。
知らちゃんでぃぬ事やん=知らしたという事だ。
やくとぅ、首里・那覇ぬ人んちゃあや=だから、首里那覇の人々は。
進貢船迎えゆるしこういむこういぬ=進貢船を迎える支度が。「しこういむこうい」は「支度、準備」の意味。「しこうゆん」は「準備する、支度する、(ご馳走などを)作る」の意味がある。
なたるばすやたん=できたわけである。「なゆん」は「成る、出来る」の意味。
沖縄戦んじ=沖縄戦で。
米軍が初みに上陸さる所んくまやたん=米軍が初めに上陸したところもここである。「所(とぅくま)」は「とぅくる」でも良い。
先じえ=先ずは。
水、確保そおか んでえ=水を確保しておかねねば。
ならん でぃぬ=ならない との。
考え んでえ ん あてぃ=考え など も あって。
島あ 先に=島は 先に。
取らりいる ばあ どぅ やる=取られる わけ である。「どぅ」は前語を強調する助詞で、次にくる「やん」は通常は「やる」という連体形で結ぶ。

イメージ 1

 
 那覇市鏡原(なふぁしきよはら)から古波蔵(くふぁんぐぁ)まんぐらぬ眺み。朝早(あさへえ)くやくとぅ、なあだ風(かじ)んみぐてえ居(をぅ)らな、漫湖お鏡(かがん)ぬ如(ぐと)おん。鏡原や鏡水(かがんじ)からぬ流りなとおん。鏡水や今あ那覇空港(なあふぁくうくう)とぅし、地(じい)ぬ取(とぅ)らっとくとぅ、くまんかい、移(うち)たんでぃぬ事(くとぅ)やん。あんし、「鏡水」から「鏡」取やあに、「鏡原」んでぃち名付(なあじ)きさんでぃぬ事やん。やくとぅどぅ、くまぬん鏡ぬ如(ぐと)おがやあ?。写真ぬくりかあや、いいくる埋立(うみたてぃ)なやい、昔(んかし)ぬ面影(うむかじ)え諸無(むるね)えらん。今(なま)あ漫湖ぬ周(まあ)いやひる木(ぎい)までぃけえ植(ゐ)いらりやい、鉄橋(てぃっちゅう)ん架きらっとおん。実(じゅん)に、まあまあまでぃ、人間(にんじん)たるむのお、自然(しじん)、造(つく)い変(け)えゆがやあ。
【語句】
那覇市鏡原から古波蔵まんぐらぬ眺み=那覇市鏡原から古波蔵方面の眺め。
朝早くやくとぅ=朝の早い時間帯なので。
なあだ風んみぐてえ居らな=まだ風も回っておらず。
漫湖お鏡ぬ如おん=漫湖は鏡のようである。
鏡原や鏡水からぬ流りなとおん=鏡原は鏡水からの流れである。
鏡水や今あ那覇空港とぅし=鏡水は今は那覇空港として。
地ぬ取らっとくとぅ=とちが取られているので。
くまんかい、移たんでぃぬ事やん=ここに移ったとのことである。
あんし、「鏡水」から「鏡」取やあに=そして、「鏡水」から「鏡」を取り。
「鏡原」んでぃち名付きさんでぃぬ事やん=鏡原と名付けたとの事だ。
やくとぅどぅ=だから(こそ)。
くまぬん鏡ぬ如おがやあ?=ここも鏡のようなのか。
写真ぬくりかあや=写真のここら辺は。
いいくる埋立なやい=だいたいは埋立になっており。
昔ぬ面影え諸無えらん=昔の面影は全くない。
今あ漫湖ぬ周いや=今は漫湖の周りは。
ひる木ぎいまでぃけえ植いらりやい=マングローブまで植えられてしまい。
鉄橋ん架きらっとおん=鉄橋まで架けられている。
実に、まあまあまでぃ=ほんとうにどこまで。
人間たるむのお=人間たるものは。
自然、造い変えゆがやあ=自然を作り変えるのだろうか。

↑このページのトップヘ