2010年09月

イメージ 1

 うちなあんじえ、赤互屋根(あかがあらやに)ぬ家(やあ)や、まあにんあしが、くまぬ風景(ちいち)やかわてぃ、同(い)ぬ所(とぅくる)んかい赤互家ぬ揃(すり)てぃ、ちゅらむんやん。25年前(にんめえ)まんぐるんじん、くま写真ぬじゃるむんやしが、うんにいとぅ、てえげえや何(ぬう)ん変わらん。うちなあんじえ、赤瓦家や建てぃららんなてぃから、何十年(なんじゅうに)ぬんなゆん。赤互ぬ中(なあか)あ、半筒状なとおくとぅ、中ぬ空気(くうち)ゆいに、でえじなぬ断熱効果(だんにちくうか)ぬあら筈(はじ)やしが、雨(あみ)ぬ漏(む)たい、むち塗(ぬ)たいすぬ暇(ふぃま)だあり考えいねえ、補助金ぬあらわん、民間ぬんじえ、使(ちか)ゆる人(ちゅ)お、いいくる居(をぅ)らん。

【語句】
うちなあんじえ=沖縄では。「うちなあ」は「おきなわ」(文語)の口語表記。「おもろさうし」では、「おきなわ」、「ゆきなわ」などとある。
赤互屋根ぬ家や=赤互屋根の家は。
まあにんあしが=どこにもあるが。
くまぬ風景やかわてぃ=ここの風景はとくに。
同ぬ所んかい=同じ所に。
赤互家ぬ揃てぃ、ちゅらむんやん=赤互が集中して、美しい。
25年前まんぐるんじん=25年前ごろにも。
くま写真ぬじゃるむんやしが=ここの写真を撮ったが。
うんにいとぅ、てえげえや何ん変わらん=あの頃と殆ど変わらない。
うちなあんじえ、赤瓦家や=沖縄では赤互家は。
建てぃららんなてぃから、何十年ぬんなゆん=建てられなくなってから何十年にもなる。
赤互ぬ中あ、半筒状なとおくとぅ=赤瓦の中は半筒状になっているから。
中ぬ空気ゆいに=中にある空気のために。
でえじなぬ断熱効果ぬあら筈やしが=大きな断熱効果があるはずなのだが。
雨ぬ漏たい、むち塗たいすぬ=雨漏りがしたり、漆喰を塗ったりする。
暇だあり考えいねえ=手間隙を考えれば。
補助金ぬあらわん=補助金があろうとも。
民間ぬんじえ、使ゆる人お=民間ではこれを使う人は。
いいくる居らん=殆どいない。

イメージ 1

 南城市ぬ玉城(たまぐしく)んかいアマミキヨが上陸さんでぃ言ゃっとおるヤハラヅカサんでぃゆる浜ぬあん。うぬ浜ぬたんかあんんかいアマミキヨぬ屋敷跡(やしちあとぅ)んでぃさっとおる浜側御嶽(はまがあうたき)ぬあん。
 今(なま)あ、だてん造(ちゅく)い直(のお)さってぃ、実(じゅん)にぬ昔(んかし)ぬままぬ有様がやたらあ分からんなとおん。やしが御嶽ぬ小庭(ぐななあ)ぬ周(まあ)いんかいや石積(いしじみ)ぬ如(ぐと)おるむぬぬあん(写真)。木(きい)ぬ根(にい)ぐいなかいけえ覆(うす)すらっとおるむぬおやしが、確かに、自然(しじん)ぬ石ぬ間々(いえだいえだ)あ、人(ちゅ)ぬ積(まじ)でええんでぃ思(うま)ありいる石垣(いしがち)ぬあん。
 「アマミキヨ」や文語どぅやる。口語しえ「アマミチュウ」んでぃ言ん。浜比嘉島(ばまひじゃ)んじえ、今(なま)やてぃんあんし言(ゆ)ん。「あまみ人」んでぃゆる意味やん。「アマミ」んでえ、ゆうさんでえ、古代大和海軍ぬ「海部族」ぬ事(くと)おあらに。
 我(わん)ねえ、伝(ちて)えらっとおんねえし、「アマミキヨ」や琉球ぬ創生神でぃちえ信てえ居(をぅ)らん。


【語句】
南城市ぬ玉城んかい=南城市玉城に。
アマミキヨが上陸さんでぃ言ゃっとおる=アマミキヨが上陸したと言われている。
ヤハラヅカサんでぃゆる浜ぬあん=ヤハラヅカサという浜がある。
うぬ浜ぬたんかあんんかい=その浜の向かいに・
アマミキヨぬ屋敷跡んでぃさっとおる=アマミキヨの屋敷跡とされる。
浜側御嶽ぬあん=浜川御嶽がある。
今あ、だてん造い直さってぃ=今はきれいに造り直され。
実にぬ昔ぬままぬ=本当に昔のままの。
有様がやたらあ分からんなとおん=有様だったのか分からなくなっている。
やしが御嶽ぬ小庭ぬ周いんかいや=だが、御嶽の小さな庭の周囲には。
石積ぬ如おるむぬぬあん=石積みのようなものが確認される。
木ぬ根ぐいなかいけえ覆すらっとおるむぬおやしが=木の根に覆われてしまってはいるが。
確かに、自然ぬ石ぬ間々あ=確かに自然の石の間には。
人ぬ積でえんでぃ思ありいる石垣ぬあん=人が積んだと思われる石垣がある。
「アマミキヨ」や文語どぅやる=「アマミキヨ」というのは文語である。
口語しえ「アマミチュウ」んでぃ言ん=口語では「アマミチュウ」という。
浜比嘉島んじえ、今やてぃんあんし言ん=浜比嘉島では今でもそういう。
「あまみ人」んでぃゆる意味やん=「あまみ人」という意味である。
「アマミ」んでえ=「アマミ」とは。
ゆうさんでえ=ひょっとすると。
古代大和海軍ぬ「海部族」ぬ事おあらに=古代大和海軍の「海部族」なのではないのか。
我ねえ=私は。
伝えらっとおんねえし=伝承の如く。
「アマミキヨ」や琉球ぬ創生神でぃちえ=「アマミキヨ」は琉球の創生神だとは。
信てえ居らん=信じてない。

↑このページのトップヘ