2010年11月

イメージ 1

 豊見城按司(とぅみぐしくあじ)ぬ居(をぅ)たる14~15世紀(しいち)頃(ぐる)栄(さけ)えとおたんでぃ言ゃっとおん。
 戦前迄(いくさめえまでぃ)、残(ぬく)とおたる城壁(いしがち)とぅかアーチ門(ぞう)や戦争(いくさ)なかい壊(くう)さってぃ今(なま)あ、無(ね)えらん。
 前(めえ)や、公園(くういん)とぅさあに、使(ちか)あらっとおたしが、今あ、けえ閉(くう)うらってぃ、さぼうりがなさぼうりてぃ、ハブ所(どぅくる)とぅけえ成とおんでぃぬ事(くとぅ)やん。
 写真ぬくりかあや饒波川(ぬふぁがあ)、漫湖むてぃいや、昔(んかし)え、干瀬(ぴし)どぅやたんでぃぬ事やしが、今あ、ひるぎ所とぅ成とおん。まんぐらあ、あいゆかん、開(ふぃら)きてぃ、栄えとおるむぬ、何(ぬう)がなんかい利用する道え無えらんどぅあがやあ。

【語句】
豊見城按司ぬ居たる=豊見城按司のいた。「按司」は地方の豪族、近年は貴族(ゆかっちゅう)の事。
14~15世紀頃栄えとおたんでぃ言ゃっとおん=14~15世紀頃栄えたといわれる。
戦前迄、残とおたる城壁とぅかアーチ門や=戦前迄残っていた城壁やアーチ門は。
戦争なかい壊さってぃ=戦争で破壊され。
今あ、無えらん=今は残っていない。
前や=以前は。
公園とぅさあに=公演として。
使あらっとおたしが=利用されていたが。
今あ、けえ閉うらってぃ=今は閉鎖され。
さぼうりがなさぼうりてぃ=荒れるに任せ。
ハブ所とぅけえ成とおんでぃぬ事やん=ハブの棲み場(ハブ地帯)と化しているということだ。「風所」は「風が良く吹く場所」、「すがり所」は「涼しい場所」などの意味となる。
写真ぬくりかあや饒波川=写真のこちら側は饒波川。
漫湖むてぃいや=漫湖側は。
昔え、干瀬どぅやたんでぃぬ事やしが=干瀬であったとのことだが。
今あ、ひるぎ所とぅ成とおん=今はマングローブ地帯となった。
まんぐらあ、あいゆかん、開きてぃ=周辺は、とても開けていて。
栄えとおるむぬ=栄えているのだから。
何がなんかい利用する道え=有効活用する方法は。
無えらんどぅあがやあ=無いのだろうか。

イメージ 1

 勝連城祉(かっちんぐしく)ぬ写真や今迄(なままでぃ)、幾(いく)けぬん、くぬHPんかい載(ぬ)してぃ来(ち)ゃるむぬやしが、南(ふぇえ)むてぃいぬ海ぬ埋立(うみた)てぃらったい、新道(みいみち)ぬ造(ちゅく)らったいさあに、でえじな、あい変わてぃ来ょおん。やしが、くぬまんぐらあ、なあだ我(わあ)が童(わらび)ぬばすぬ景色(ちいち)とぅ変わてえ居(をぅ)らんくとぅ、今ぬうちなかい、写真、ばんない撮(ぬ)じょうかなんでぃ思(うみ)ゆん。勝連城や城主(ぬうし)ぬ阿麻和利(あまわい)ぬ滅(ふる)ばさってぃ後(あとぅ)、500年余(にんあま)いなあん、捨(し)てぃ放(ほう)りいさってぃ来ゃしが、今あ財政(じぬ)んあてぃがやらあ、復元工事(ふくぎんぶしん)ん進(しし)みらっとくとぅ、くりえ良い事(くとぅ)やんでぃ思ゆん。

【語句】
勝連城跡ぬ写真や今迄=勝連城跡の写真は今迄。
幾けぬん、くぬHPんかい=このHPに。
載してぃ来ゃるむぬやしが=掲載してきたのであるが。
南むてぃいぬ海ぬ埋立てぃらったい=南側の海が埋め立てられたり。
新道ぬ造らったいさあに=新道が建設されたりで。
でえじな、あい変わてぃ来ょおん=非常に変化してきてきた。
やしが、くぬまんぐらあ=だが、この周辺は。
なあだ我が童ぬばすぬ景色とぅ=まだ私が子どもの頃の景色と。
変わてえ居らんくとぅ=変化してないので。
今ぬうちなかい=今のうちに。
写真、ばんない撮じょうかなんでぃ思ゆん=写真をどんどん撮っておこうかと思う。
勝連城や城主ぬ阿麻和利ぬ=勝連城は城主の阿麻和利が。
滅ばさってぃ後、500百年余いなん=滅ぼされて後の500年余も。
捨てぃ放りいさってぃ来ゃしが=放置されてきが。
今あ財政んあてぃがやらあ=現在は財政があるためなのか。
復元工事ん進みらっとくとぅ=復元工事も進められているので。
くりえ良い事やんでぃ思ゆん=これは良いことだと思う。

↑このページのトップヘ