沖縄あまはいくまはい

　今（なま）ぬ末吉（しいし）宮ぬ南（ふぇえ）むてぃいんかい長石道（ながいしみち）ぬあん。
　昔（んかし）ぬ宿道（しゅくみち）がやたら、東（あがり）え首里（すい）ぬ平良（てえら）まんぐら迄（までぃ）通（とぅう）とおたる筈（はじ）やしが、西（いりい）やまあ迄が通（とぅう）とおたら。今あ人一人（ちゅちゅい）ん通らんしからあさる道なとおん。
　我勘違（わあかんちげ）えあらんでえ、玉城（たまぐしく）朝薫ぬ書ちぇえる組踊「執心鐘入り」ぬ舞台（ぶてえ）や末吉宮ぬ下（しちゃ）んかいあたる「末吉ぬ寺（てぃら）」（遍照寺、元お、万寿寺）がうぬモデルとぅなとおんでぃぬ事（くとぅ）？。
　やれえ、中城若松（なかぐしくわかまち）ぬ女（ゐなぐ、鬼）なかい追（わ）あってぃちゃしえ、くぬ道ぬ積（ち、つぃ）むええ？。あんせえ、くぬ道え鬼道（うにみち）？何（ぬう）がやら恐（うとぅ）るさぬ後（くさあ）とぅん返（けえ）たいさん。

　勝連城祉（かっちんぐしくあとぅ）お、前（めえ）や幾（いく）けぬん載（ぬ）してぃちゃるむぬやしが、近頃（ちかぐる）お、あまくま工（くう）さってぃ、ちゅらくなとおくとぅ、またん載（ぬ）しら。
　地形的（ちきいてぃち）ねえ半島ぬ上（ゐい）んかい高上（たかあ）がいそおくとぅ、写真ぬん、他（ふか）ぬまぎ城（ぐしく）やかん撮（ぬ）じいぢゅらん。
　我（わあ）が中学生（ちゅうがくしい）やいにいや、観光客（かんこうちゃく）お、むっさとぅ、来（く）うんたしが、今（なま）あ、世界遺産（しけえいさん）ぬんかいなたる事（くとぅ）んあてぃがやら、多（うふ）くなとおん。
　山原（やんばる）から島尻迄見（しまじりまでぃみ）ゆる大（うふ）パノラマあ、実（じゅん）に、見事（みぐとぅ）やん。正門（じょう）や写真ぬくまぬ方（はた）なとん。
　うぬあたいうぬうぬ城お広（ふぃる）さたん。最後（いちばんあとぅ）ぬ主（ぬうし）やたる阿麻和利（あまわい）ぬ世迄（ゆうまで）え、勝連半島や沖縄一ぬはなぐにやたんでぃぬ事。