2017年02月

イメージ 1

 くねえだぬ十六日祭(じゅうるくにちい)ぬばすぬ親戚(ゑえか)廻(みぐ)いからぬ戻(むどぅ)やあ、南風原(ふぇえばる)んじ抜(ぬ)じゃる写真(しゃしん)やん。
 夕さんでぃぬ5時(ぐじ)まんぐるどぅやくとぅ、実(じゅん)ねえ、なあふぃん明(あか)さたしが、黒雲(くるくむ)ぬある故(ゆい)がやら、写真からあ暗(くら)がてぃ見(み)いゆん。
 黒雲ぬ穴(あな)から太陽(てぃだ、てぃいだ)ぬ光(ふぃちゃい)ぬ上下(ゐいしちゃ)んかい広(ふぃる)がい出(ん)じとおる有様(ありさま)ぬ、どぅく、ちびらあさたくとぅどぅ、抜(ぬ)じ見(ん)ちゃる。
 赤(あこ)う黒(くろ)うんでえ、夕(ゆ)さんでぃ明(あ)かがいぬ別(びち)ぬ言(い)い様(よう)どぅやしが、何(ぬう)がやら、恐(うとぅる)さる響(ふぃび)ちぬする言葉(くとぅば)やん。
 赤(あか)ってえんそおる所(とぅくる)お、なんぞお無(ね)えらのおあしが、うんな景色(ちいち)どぅ「赤う黒う」んでぃぬ言い様んかい、相応(ふさ)とおてえ居(をぅ)らんがやあ。
 雨水(うしい)寒(びい)さぬ節(しち)えやしが、太陽ん負(まき)きら如(ぐとぅ)、意地(いじ)出(ん)じゃち、やっぱとおんねえ思(うま)ありいん。

【語句】
くねえだぬ十六日祭ぬばすぬ親戚廻いからぬ戻やあ=この前の十六日祭の親戚廻りの帰りに
南風原んじ抜じゃる写真やん=南風原町で撮った写真である。
夕さんでぃぬ5時まんぐるどぅやくとぅ、実ねえ=夕方の五時ごろなのであるから、本当は
なあふぃん明さたしが、黒雲ぬある故がやら=もっと、明るかったのであるが、黒雲のあるためなのか、
写真からあ暗がてぃ見いゆん=写真からは暗く見える。
黒雲ぬ穴から太陽ぬ光ぬ上下んかい広がい出じとおる有様ぬ=黒黒も穴から太陽光線が上下に広がり出ている様が
どぅく、ちびらあさたくとぅどぅ、抜じ見(ん)ちゃる=あまりにも、面白いので、撮ってみたのである。
赤う黒うんでえ、夕さんでぃ明かがいぬ別ぬ言い様どぅやしが=「赤う黒う」とは夕焼けの別称なのであるが、
何がやら、恐さる響ちぬする言葉やん=何やら、おどろおどろしい響きのする言葉である。
赤ってえんそおる所お、なんぞお無えらのおあしが=(この景色には)赤い部分は、殆ど無いのであるが、
うんな景色どぅ「赤う黒う」んでぃぬ言い様んかい=この景色こそ、「赤う黒う」の表現に
相応とおてえ居らんがやあ=マッチしているのはないか。
雨水寒さぬ節えやしが、太陽ん負きら如=雨水の頃の冷え込む季節であるが、太陽も負けずと、
意地出じゃち、やっぱとおんねえ思ありいん=強がって、踏ん張っているように思える。

イメージ 1

 くぬ県道(きんどう)10号線(ぐうしん)や近(ちか)くんかいある中学校(ちゅうがっこう)んかいぬ通(かゆ)い路(みち)やん。
 うんにいや小学校(しょうがっこう)んかいん、歩(あ)っちどぅ通(かゆ)とおたくとぅ、また小学生ん、いいくるくぬ道、通(とぅう)とおたん。
 やしが、1960年(にん)頃迄(ぐるまで)え、今(なま)ぬ金武(ちん)ぬバー街(まち)とぅ似(に)ち、くぬ大道(うふみち)なありいAサインバーぬ並(なら)どおたん。
 夜(うる)おネオンぬ光(ふぃちゃ、ひちゃ)てぃ、今(なま)ぬ花街(はなまち)やかん、はんくぁやたん。
 やしが、夜(ゆう)ぬ明(あ)きいねえ、でえじな風儀(ふうじ)ん無(ね)えん道んかいあい変(か)わゆたん。
 海軍(わい)とぅ陸軍(りくぐん)のお仲(なあか、なか)ぬ悪(わ)っさたくとぅ、ホワイトビーチぬ海軍とぅ勝連城(かっちんぐしく)ぬ東(あがり)むてぃんかいあたる陸軍ぬ兵隊(ふぃいたい)同士(どうさあ)ぬ毎夜(めえゆる)、酒(さき)悔(くぁ)てぃ、喧嘩(おお)やあに、道(みち)ぬ側(すば)なありい、幾人(いくたい)がなぬ兵隊ぬ血(ちい)ごうごうし倒(とお)りとおたん。
 童(わらん)ん達(ちゃあ)にとぅてえ、うぬ有様(ありさま)あ、実(じゅん)に米兵ぬ事(くとぅ)、表(あら)わちょおる「風物詩」どぅやたる。
 まんぐらぬ生徒(しいとぅ)ん達(ちゃあ)や、うり側目(すばみ)さがなあ、学校んかい通とおたん。
 今(なま)あ何(ぬう)んあらんたんねえ、平和(ひいわ)なとおん。

【語句】
くぬ県道10号線や近くんかいある中学校んかいぬ通い路やん=この県道10号線は近くにある中学校への通学路である。
うんにいや小学校んかいん、歩っちどぅ通とおたくとぅ=あの頃は小学生も歩いて通学していたので、
また小学生ん、いいくるくぬ道、通とおたん=また、小学生もよくこの道を通った。
やしが、1960年代頃迄え、今ぬ金武ぬバー街とぅ似ち=だが、1960年代頃までは、今の金武のバー街に似て、
くぬ大道なありいAサインバーぬ並どおたん=この大通り沿いにはAサインバーが立ち並んでいた。註:Aサインバーとは米軍専用のバー(飲み屋)である。
夜おネオンぬ光てぃ、今ぬ花街やかん、はんくぁやたん=夜はネオンが輝き現在の繁華街より、派手で華やかだった。
やしが、朝ないねえ、でえじな風儀ん無えん道んかいあい変わゆたん=だが、朝になると、とてもみっともない道に変貌した。
海軍とぅ陸軍のお仲ぬ悪っさたくとぅ=(アメリカの)海軍と陸軍は仲が悪かったので、
ホワイトビーチぬ海軍とぅ勝連城ぬ東むてぃんかいあたる陸軍ぬ=ホワイトビーチの海軍と勝連城東側にあった陸軍の
兵隊同士ぬ毎夜、酒飲でぃ喧嘩やあに=兵士同士が(そのバー街で)毎晩、酒を喰らって喧嘩して
道ぬ側なありい、幾人がなぬ兵隊ぬ血ごうごうし倒りとおたん=道路脇に何人かの兵士が血まみれになって倒れていた。
童ん達にとくてえ、うぬ有様あ実に米兵ぬ事表ちょおる「風物詩」どぅやたる=(そこから通学する)子供たちにとっては、この光景は実には米兵を象徴する風物詩でそのものであった。
まんぐらぬ生徒ん達や、うり側目あがなあ、学校んかい通とおたん=周辺の生徒たちは、それを横目に通学していたのである。
今あ何んあらんたんねえ、平和なとおん=今は、何事もなかったかのように平和である。

↑このページのトップヘ