沖縄あまはいくまはい

　金武（ちん）や田所（たあどぅくる）んやん。
　戦前（いくさめえ）や田（たあ）ぶっくゎあぬ景色（ちいち）えまあにんあたしが、今（なあ）あ、見（ん）じいねえ、肝（ちむ）わさわさあするあたい、町方（まちがた）んああち、中頭島尻（なかぐみ、しまじり）ぬ人（ふ）ん達（ちゃあ）にとぅてえ、大事（でえじ）なみんだし物（むん）やん。
　田（たあ）や水（みじ）ぬ無（ね）えらんでえ成（なら）らん。
　田ぬある所（とぅくる）お当（あ）たい前（めえ）ぬ事（くとぅ）、又（また）水所（みじどぅくる）んやん。
　やくとぅ、田ぶっくゎぬある所お大事な豊（ゆたか）なてぃ見（みい）ゆん。
　んちゃ、近（ちか）くんかいや、大（ま）ぎ川（かあら）ん流（なが）りとおい、恩納（うんな）とぅ金武ぬ間（ええだ）んかいや高森（たかむい）んあん。
　田、見（ん）ちょおちいねえ、小（くう）さるばす、家組（やあぐな）揃（すり）てぃ、稲刈（いにか）いしちゃる事（くとぅ）思（うび）い出（ん）じゃすん。
　くまやかやぐま田小（たあぐゎあ）どぅやたしが、まんぐらんじ、遊ぶるうっさし、何（ぬう）がやらいしょうさたん。
　うんにいぬ童（わら）ん達（ちゃあ）や、いいくる田ぬまんぐらぬ小堀小（くむいぐゎあ）んじ、泳（ゐい）じゃるむぬやしが、今（なま）ぬ童ん達ん、泳じ遊（あし）びいがすら。

　世（ゆう）どぅりえ、浦添城（うらしいぐしく）ぬ北向（にしむ）てぃんかいある墓（はか）やん。
　「世どぅり」んでえ、風（かじ）ぬとぅりとおる如（ぐとぅ）、戦（いくさ）ん、争（あらげえ）え事（ぐとぅ）ん無（ね）えん「平和世（ひいわゆう）」ぬ肝合（ちむええ）なかい名付（なあぢ）きらっとおん。（ヤマトゥ口風儀せえ「世凪」）。
　やしが、去（ん）じゃる沖縄戦（うちなあいくさ）ぬばすお、日米軍（にちびいいさく）ぬ２週間びけえ、うさうまさ戦（たたか）たる戦場（前田高地）（いくさば）とぅなたん。
　墓あ諸壊（むるくう）しさってぃ、今（なま）、在（あ）せえ復造（またづくい）えせえるむんどぅやる。
　うぬ戦話（いくさばなしい）や米映画（アミリカいいが）「ハクソーリッジ」なかい世界（しけ）んかい聞（ち）くぃいたん。
　怪我（きが）しちゃる米兵（びいひい）やグアムんじ養生（ようじょう）しみらってぃ、多（うふ）くお死（し）に残（ぬく）たんでぃしが、日本兵（にふんひい）や西原（にしばら）ぬ陸軍病院んかい添（そ）うらってぃ行（ん）じん、養生ぬしい道（みち）ん無（ね）えらな、いいくる死じゃんでぃぬ事(くとぅ)。
　日米ぬ沖縄人（うちなあちゅ）ぬ歴史（りちし）ん肝（ちむ）ん、むさっとぅ肝（ちむ）に掛（か）きらんかしえ、うんにいん今（なま）ん同（い）ぬむんやん。
　傍（すば）ふぃらんじ眠（にん）とおる伊波普猷ん、安（やし）まらんたる筈（はじ）。