2019年01月

イメージ 1

 絵画(いい)ぬ如(ぐと)おる景色(ちいち)やたくとぅ、覚(うび)らじに、カメラぬシャッター押(う)すたるばすやん。
 沖縄人(うちなあんちゅ)にとぅてえ、赤瓦(あかがあら)ぬ家(やあ)や古物(ふるむ)のおあらんてぃん、肝(ちむ)うらあきらりいん。
 地(ぢい)やコンクリートん敷(し)かってえ居(をぅ)らな、木(きい)なかい囲(かく)まあっとおる赤瓦ぬ景色え、何(ぬう)がやら、かわてぃ、あながしさぬならん。
 くぬ風景(ちいち)や玉泉洞、琉球村(るうちゅうむら)んでえぬ公園(くういん)ぬんあらん。また、文化財(ぶんくゎぜえ)とぅかんあらん。
 「生(い)ち身(み)」とぅしちぬ風景なとおくとぅ、目張(みいは)い事(ぐとぅ)んやい、ゐいりきさんあん。
 21世紀(しいち)なてぃ、世(ゆう)ん色々(いるいる)とぅうち変(か)わとおる万事(ばんじ)えやいやすしが、何時(いち)迄(までぃ)ん、沖縄らあさる風景ん文化ん又(また)、肝心(ちむぐくる)ん、むとぅうち行(い)ちゅる如(ぐとぅ)、願(にが)やびら。

【語句】
絵画ぬ如おる景色やたくとぅ、覚らじに=絵画のような風景だったので
カメラぬシャッター押すたるばすやん=カメラのシャッターを押した次第である。
沖縄人にとぅてえ、赤瓦ぬ家や古物のおあらんてぃん=沖縄人にとって、赤瓦は時代物でなくても
肝うらあきらりいん=心を癒してくれる
地やコンクリートん敷かってえ居らな=地面はコンクリート敷でなく、
木なかい囲まあっとおる赤瓦ぬ景色え=木々で囲われた赤瓦の風景は
何がやら、かわてぃ、あながしさぬならん=なぜだが、とりわけ、懐かしくて仕方がない
くぬ風景や玉泉洞、琉球村んでえぬ公園ぬんあらん=この風景は玉泉洞や琉球村等の公園でもない
また、文化財とぅかんあらん=また、文化財などでもない。
「生ち身」とぅしちぬ風景なとおくとぅ=「現役」の風景なのであるから、
目張い事んやい、ゐいりきさんあん=驚きでもあり、嬉しくもある。
21世紀なてぃ、世ん色々とぅうち変わとおる=21世紀になって、世の中も様々に変化している
万事えやいやすしが、何時迄ん=最中ではあるが、何時までも
沖縄らあさる風景ん文化ん又、肝心ん=沖縄らしい風景も文化もまた精神も
むとぅうち行ちゅる如、願やびら=続いていくことを願うものである。

イメージ 1

 県庁(きんちょう)北(にし)ぬあじまあから安里(あさとぅ)ぬ道(みち)ぐやあ迄(までぃ)ぬ道(みち)ゆ「国際通り」んでぃ言ん(ゆ)。
 戦後(いくさあとぅ)、まんぐらんかいなとおたる「アーニーパイル国際劇場」ぬ「国際」から、くぬ県道ぬあざ名(なあ)んかいなたんでぃぬ事(くとう)。
 長(なが)さあ1マイル(1.6㌔)あん。
 戦後、あたまに、くんちぇえたる所(とぅくる)なとおん。
 戦前(いくさめえ)や西(にし)、久米(くみ)、辻(ちいじ)まんぐらぬどぅ、むてえとおたしが、米軍(びいぐん)なかいけえ取(とぅ)らったる事(くとぅ)なかい、戦後おくまぬどぅ、一番(いちばん)、むてえとおる所(とぅくる)とぅなたん。
 米軍なかい家屋敷(やあやしち)取らったる人(ちゅ)ん達(ちゃあ)や、安里(あさとぅ)、牧志(まちし)まんぐらんじ群屋敷(びりやしち)造(つく)てぃ住(し)どおたるむぬやしが、今(なま)あ、いっそうから区画整理さったる為(たみ)なかい、美(ちゅ)ら街(まち)なとおん。
 早(ふぇえ)くお並柳(なんやなじ)道やたしが、今あ並椰子(やあし)道けえなとおん。

【語句】
県庁北ぬあじまあから安里ぬ道ぐやあ迄ぬ道ゆ=県庁北の十字路から安里三差路までの道路を
「国際通り」んでぃ言ん=「国際通り」という
 戦後、まんぐらんかいなとおたる=戦後、付近にできた
「アーニーパイル国際劇場」ぬ「国際」から=「アーニーパイル国際劇場」の「国際」から
くぬ県道ぬあざ名んかいなたんでぃぬ事=この県道の俗称にになったとのことだ。
長さあ1マイル(1.6㌔)あん=距離は一マイル(1.6㌔)ある。
戦後、あたまに、くんちぇえたる所なとおん=戦後、いち早く復興を遂げた場所である
戦前や西、久米、辻まんぐらぬどぅ、むてえとおたしが=戦前は西、久米、辻あたりが繁華街だったが
米軍なかいけえ取らったる事なかい=米軍に接収されてしまったために、
戦後おくまぬどぅ、一番、むてえとおる所とぅなとおん=戦後はここが一番華やかな場所となった。
米軍なかい家屋敷取らったる人ん達や=米軍に家屋、屋敷を接収された人々は、
安里、牧志まんぐらんじ群屋敷造てぃ=安里や牧志あたりに粗末な家を建てて、
住どおたるむぬやしが、今あ、いっそうから=住んでいたたのであるが、現在は、殆ど
区画整理さったる為なかい、美ら街なとおん=区画整理されたおかげで、きれいな街になった。
早くお並柳道やたしが、今あ並椰子道けえなとおん=以前は柳並木だったが、現在は椰子並木になった

↑このページのトップヘ